ශ්‍රී ලංකාවේ පළමු රොබෝ දුරස්ථ සැත්කම් දෙක කිංග්ස් රෝහලේදී සාර්ථකව සිදු කරයි
ශ්‍රී ලංකාවේ පළමු රොබෝ දුරස්ථ සැත්කම් දෙක පසුගිය දා කිංග්ස් රෝහලේදී සාර්ථකව සිදුකර තිබෙනවා.
සැත්කම් සිදුකළ විශේෂඥ ශල්‍ය වෛද්‍යවරුන් සිටියේ කිලෝමීටර් 3,000කට වැඩි දුරකින් පිහිටි නවදිල්ලියේදීයි.
මහාචාර්ය ශ්‍රීනාත් චන්ද්‍රසේකර සහ මහාචාර්ය බවන්ත ගමගේ අධිවේගී සන්නිවේදන ජාලයක් ඔස්සේ සම්බන්ධ කළ රොබෝ ශල්‍ය පද්ධතියක් භාවිත කරමින් මෙම සැත්කම් සිදුකර තිබෙනවා.
මෙහෙයුම් දෙකම අතරතුර කොළඹදී රෝගීන් අසල විශේෂඥ ශල්‍ය වෛද්‍යවරුන් රැඳී සිටි අතර, වෛද්‍ය හෝ තාක්ෂණික ගැටලුවක් ඇති වුවහොත් වහාම මැදිහත් වීමට සූදානමින් සිටි බව රෝහල සඳහන් කළා.
කෙසේ වෙතත්, සැත්කම් දෙකම දුරස්ථව අවසන් කර ඇති අතර, එම වෛද්‍යවරුන්ගේ මැදිහත්වීමක් අවශ්‍ය වී නොමැත.
රොබෝ දුරස්ථ සැත්කමකදී, දුරස්ථ පාලක මධ්‍යස්ථානයක සිටින ශල්‍ය වෛද්‍යවරයාගේ චලනයන් මගින් රෝගියා අසල ඇති ශල්‍ය උපකරණ පාලනය කෙරෙනවා.
වැඩිදියුණු කළ දෘශ්‍යතාව සහ උපකරණ නිවැරදිව පාලනය කිරීම මගින් දුරස්ථ ස්ථානයක සිට සංකීර්ණ ශල්‍ය කටයුතු සිදු කිරීමට මෙය ඉඩ සලසනවා.
මෙම සැත්කම්, ශ්‍රී ලංකාවේ පළමු රොබෝ හෘද සැත්කම සිදුකළ කිංග්ස් රෝහලේ පෙර ජයග්‍රහණයෙන් පසුව සිදුවූ තවත් පියවරක් බව රෝහල පවසනවා.
අනාගතයේදී, විශේෂඥ ශල්‍ය සේවා ලබාගැනීමට දුර බැහැර ප්‍රදේශවල රෝගීන්ට ප්‍රධාන නගර වෙත පැමිණීමට සිදුවන අවස්ථා අඩු කිරීමට මෙම තාක්ෂණයට හැකියාව තිබිය හැකියි.
සුදුසු උපකරණ සහිත ප්‍රාදේශීය රෝහලකදී රෝගියාට ප්‍රතිකාර ලබාදෙන අතර, විශේෂඥ වෛද්‍යවරයා වෙනත් මධ්‍යස්ථානයක සිට සැත්කම මෙහෙයවීම එවැනි හැකියාවක් ලෙස දක්වා තිබෙනවා.
විදේශීය විශේෂඥ දැනුම මෙරට රෝගීන්ට ලබාගැනීමට ද මෙය අවස්ථාවක් විය හැකියි.
ශල්‍ය පුහුණුව සහ ජාත්‍යන්තර සහයෝගීතාව සඳහා ද මෙම තාක්ෂණය යොදාගත හැකි බව රෝහල සඳහන් කළා.
එහෙත් එය පුළුල්ව භාවිත කිරීමට විශ්වාසදායක සන්නිවේදන ජාල, සුදුසු පහසුකම් ඇති රෝහල්, පුහුණු කණ්ඩායම් මෙන්ම පැහැදිලි නියාමන සහ ආරක්ෂක ක්‍රියාමාර්ග අවශ්‍ය වනවා.
මෙම සැත්කම් දෙකෙන් දුරස්ථ රොබෝ සැත්කම් සිදුකිරීමේ හැකියාව පෙන්වා දී ඇති අතර, රෝගීන්ගේ ස්ථානය නොසලකා විශේෂඥ ශල්‍ය සේවා ඔවුන් වෙත සමීප කරගැනීම එහි දිගුකාලීන හැකියාව ලෙස රෝහල පෙන්වා දෙනවා.